التونسي ( غالبا ) كيف ما في الواقع كيف ما في الفيس بوك عاطفي ، مزاجي و متقلب ،،، مع كل وقت و كلّ فصل – يتطبّعْ – و يتأقلم و يصبح إحترافي زادة حسب الظروف و الملابسات ،،،،
في رمضان مثلا منشوراته تشعّ بالتقوى على الصيام و العبادات و القيام و النّوافل ، في العيد على الأضحية و صلاة العيد و الأدعية ،،، في الصّيف ، نفس التونسي منشوراته تصبح على الخلاعة و الشطوط العراء و الدلاّع و البطيخ و مشتقاتهما و على الأعراس و كساوي العرس …. و كيف يجي موسم الحجّ تلقاه يرجع شويّا و يولي يحكي على 10 أيام من ذي الحجّة و على الأدعية و الأذكار و ما شابه ،،،، و ما ينساش ليلة الجمعة باش يعمل copier / coller متاع ( جمعة مباركة ) شويا أدعية ، اما باقي الايام فلاحرج عنده ، تصيورة متاع فنانة و الا رڨاصة و الا خبيّر متاع تنبير و زيد يعمل فيها محلل سياسي ينقل و يعلق على احداث السياسة و ينكًت ( يرحم الحرية ) ع الباجي و الغنوشي و باقي السياسيين ، فلان سرق و فلان ڨطع و فلان شرى بالاص و لآخر شرى يخت و هات من هاك اللاوي … حاصيلو التونسي وين تلوّج تلقاه ،،، ما عندوش ثوابت و الفتاوي في جيبه ….هو من قبل ناقص و زاد عليه البورطابل و الفيس بوك !
الموقع الرّسمي منجي باكير 